നാഷണൽ പേയ്‌മെൻ്റ് കോർപ്പറേഷൻ ഓഫ് ഇന്ത്യ 2016-ൽ വികസിപ്പിച്ചെടുത്ത ഒരു ഇന്ത്യൻ ഇൻസ്റ്റൻ്റ് പേയ്‌മെൻ്റ് സംവിധാനമാണ് യുപിഐ .
സാങ്കേതിക വിദ്യ വളരെയധികം വളർന്നുവന്ന സാഹചര്യത്തിൽ ഇന്ന് വളരെ പ്രചുരപ്രചാരം നേടിയിരിക്കുകയാണ് യു പി ഐ ഇടപാടുകൾ.
NEFT, RTGS അല്ലെങ്കിൽ IMPS പോലുള്ള പരമ്പരാഗത രീതികളേക്കാൾ വേഗത്തിലും കാര്യക്ഷമമായും UPI വഴി വളരെവേഗത്തിൽ ഫണ്ട് കൈമാറ്റങ്ങൾ പ്രാപ്തമാക്കുന്നു എന്നത് ആളുകളെ ഈ സാങ്കേതിക വിദ്യ ഉപയോഗിക്കാൻ പ്രേരിപ്പിക്കുന്നു. ബാങ്ക് പ്രവൃത്തി സമയമോ അവധി ദിവസങ്ങളോ പരിഗണിക്കാതെ UPI സേവനങ്ങൾ 24 മണിക്കൂറും ലഭ്യമാണ് എന്നത് ഇതിന്റെ മറ്റൊരു വലിയ പ്രത്യേകതയാണ്.
ദശലക്ഷക്കണക്കിന് ഇന്ത്യക്കാർക്ക് ആണ് യു പി ഐ ഉപയോഗിക്കുന്നത്. രാജ്യത്ത് പണത്തിൻ്റെ ഉപയോഗം കുറയ്ക്കാനും ഇത് സഹായിച്ചിട്ടുണ്ട്.
സാധാരണക്കാരെപ്പോലെ ബിസിനസ്സുകൾക്കും യു പി ഐ വഴിയുള്ള ഡിജിറ്റൽ പേയ്‌മെൻ്റുകൾ സ്വീകരിക്കുന്നത് അവരുടെ വിൽപ്പന വർദ്ധിപ്പിക്കാനും കാരണമായിത്തീർന്നിട്ടുണ്ട്.
UPI വഴിയുള്ള പണമിടപാടുകൾ ദിനംപ്രതി വർധിച്ചുവരികയാണ്‌. ഇക്കഴിഞ്ഞ ഫെബ്രുവരിയിൽ 18.28 ലക്ഷം കോടി രൂപയുടെ ഇടപാടുകളാണ് ഈ ഡിജിറ്റൽ പ്ലാറ്റുഫോമിലൂടെ നടന്നിരിക്കുന്നത്.
വർധിച്ചുവരുന്ന യു പി ഐ ഇടപാടുകൾ കാരണം ഈ ഇടപാടുകൾക്ക്‌ ചാർജ് ചുമത്തുന്നത് സംബദ്ധമായ ഒരു വാർത്ത പ്രചരിക്കുന്നുണ്ട്. 2022 ആഗസ്റ്റിൽ ഇതിനെക്കുറിച്ച് ഒരു പ്രൊപോസൽ റിസേർവ് ബാങ്ക് മുന്നോട്ടു വെച്ചിരുന്നു. പക്ഷെ പിന്നീട് അതിനെപ്പറ്റി കൂടുതലൊന്നും കേട്ടിരുന്നില്ല.
എന്നാൽ ഇങ്ങനെ ഒരു നീക്കമുണ്ടായാൽ ഇപ്പോൾ ഉള്ള യു പി ഐ ഉപഭോക്താക്കളിൽ ഏകദേശം മുക്കാൽ പങ്കും ഈ സേവനം ഉപേക്ഷിക്കും എന്നാണ് ഒരു സർവേ വ്യക്തമാക്കുന്നത്.
യു പി ഐ ഇടപാടുകൾക്കു ചാർജ് വരുമോ എന്ന ആശങ്ക പലയിടങ്ങളിൽനിന്നും ഉയർന്നുവരുന്നുണ്ട്. എന്നാൽ ഇങ്ങനെയൊരു തീരുമാനം ഇതുവരെയും എടുത്തിട്ടില്ല എന്നാണ് ധനമന്ത്രാലയ വൃത്തങ്ങൾ സൂചിപ്പിക്കുന്നത്.
