നിർണായക ശുപാർശയുമായി ട്രായ്
ഇന്ത്യയിലെ ടെലികോം രംഗത്ത് വലിയ മാറ്റങ്ങൾക്ക് വഴിയൊരുക്കുന്ന നിർണായക ശുപാർശയുമായി ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്). സാധാരണ സ്മാർട്ട്‌ഫോണുകൾക്ക് നേരിട്ട് ഉപഗ്രഹങ്ങളുമായി ബന്ധപ്പെടാൻ കഴിയുന്ന ഡയറക്ട്-ടു-ഡിവൈസ് (ഡി2ഡി) സാറ്റലൈറ്റ് കണക്റ്റിവിറ്റി രാജ്യത്ത് അനുവദിക്കണമെന്നാണ് ട്രായ് ശുപാർശ ചെയ്തിരിക്കുന്നത്. ഇതോടെ പരമ്പരാഗത മൊബൈൽ ടവറുകളുടെ സഹായമില്ലാതെയും അനുയോജ്യമായ സ്മാർട്ട്‌ഫോണുകൾക്ക് ഉപഗ്രഹങ്ങൾ വഴി ആശയവിനിമയം നടത്താനുള്ള സാധ്യത തുറക്കുകയാണ്.
2026 നവംബർ 5-നാണ് സാറ്റലൈറ്റ് കമ്മ്യൂണിക്കേഷൻ നെറ്റ്‌വർക്ക് പ്രൊവൈഡർമാർക്കായുള്ള പുതിയ അംഗീകാര സംവിധാനവും സ്പെക്ട്രം വിനിയോഗവും സംബന്ധിച്ച ശുപാർശകൾ ട്രായ് പുറത്തിറക്കിയത്. ടെലികമ്മ്യൂണിക്കേഷൻസ് ആക്ട് 2023-ന്റെ അടിസ്ഥാനത്തിൽ പുതിയ നിയന്ത്രണ ചട്ടക്കൂട് രൂപീകരിക്കണമെന്നാണ് അതോറിറ്റി കേന്ദ്ര സർക്കാരിനോട് നിർദേശിച്ചിരിക്കുന്നത്.
എന്താണ് ഡയറക്ട്-ടു-ഡിവൈസ് സാറ്റലൈറ്റ് കണക്റ്റിവിറ്റി?
നിലവിൽ മൊബൈൽ ഫോണുകൾക്ക് ഇന്റർനെറ്റും ടെലിഫോൺ സേവനങ്ങളും ലഭിക്കുന്നത് പ്രധാനമായും മൊബൈൽ ടവറുകൾ വഴിയാണ്. എന്നാൽ ഡയറക്ട്-ടു-ഡിവൈസ് സാങ്കേതികവിദ്യയിലൂടെ മൊബൈൽ ഫോണുകൾക്ക് നേരിട്ട് ഉപഗ്രഹങ്ങളുമായി ബന്ധപ്പെടാൻ സാധിക്കും.
പ്രത്യേക സാറ്റലൈറ്റ് ഫോൺ അല്ലെങ്കിൽ വലിയ ഡിഷ് ആന്റിന പോലുള്ള ഉപകരണങ്ങൾ ആവശ്യമില്ലാതെ, അനുയോജ്യമായ സാധാരണ സ്മാർട്ട്‌ഫോണുകളിൽ തന്നെ ഈ സാങ്കേതികവിദ്യ ലഭ്യമാക്കുകയാണ് ലക്ഷ്യം.
മൊബൈൽ നെറ്റ്‌വർക്ക് ലഭ്യമല്ലാത്ത ഗ്രാമപ്രദേശങ്ങൾ, മലനിരകൾ, വനമേഖലകൾ, കടൽപ്രദേശങ്ങൾ തുടങ്ങിയ ഇടങ്ങളിൽ ഈ സംവിധാനം ഏറെ പ്രയോജനപ്പെടും. പ്രകൃതിദുരന്തങ്ങൾ, പ്രളയം, ഭൂകമ്പം തുടങ്ങിയ അടിയന്തര സാഹചര്യങ്ങളിൽ പരമ്പരാഗത ടെലികോം ശൃംഖലകൾ തകരാറിലാകുമ്പോഴും ആശയവിനിമയം നിലനിർത്താൻ ഇത് സഹായിച്ചേക്കും.
രണ്ട് രീതിയിലുള്ള സാറ്റലൈറ്റ് കണക്റ്റിവിറ്റി
ഡയറക്ട്-ടു-ഡിവൈസ് സേവനങ്ങൾക്കായി രണ്ട് സാങ്കേതിക മാർഗങ്ങളാണ് ട്രായ് മുന്നോട്ടുവെച്ചിരിക്കുന്നത്.
1. MSS അടിസ്ഥാനമാക്കിയുള്ള കണക്റ്റിവിറ്റി
മൊബൈൽ സാറ്റലൈറ്റ് സർവീസ് (എംഎസ്എസ്) വിഭാഗത്തിൽ വരുന്ന എൽ -ബാൻഡ് , എസ് -ബാൻഡ് ഫ്രീക്വൻസികൾ ഉപയോഗിച്ചായിരിക്കും ഈ സംവിധാനം പ്രവർത്തിക്കുക. ഭാവിയിൽ ഇന്ത്യയിൽ വിൽക്കുന്ന സ്മാർട്ട്‌ഫോണുകളിൽ ആവശ്യമായ സാറ്റലൈറ്റ് കണക്റ്റിവിറ്റി മൊഡ്യൂളുകൾ ഉൾപ്പെടുത്താൻ നിർമ്മാതാക്കളെ കേന്ദ്ര സർക്കാർ പ്രോത്സാഹിപ്പിക്കണമെന്നും ട്രായ് ശുപാർശ ചെയ്തിട്ടുണ്ട്.
2. ഐ എം ടി സ്പെക്ട്രം ഉപയോഗിച്ചുള്ള കണക്റ്റിവിറ്റി
നിലവിൽ മൊബൈൽ നെറ്റ്‌വർക്ക് സേവനങ്ങൾക്ക് ടെലികോം കമ്പനികൾ ഉപയോഗിക്കുന്ന സ്പെക്ട്രം സാറ്റലൈറ്റ് കണക്റ്റിവിറ്റിക്കും പ്രയോജനപ്പെടുത്താൻ കഴിയുന്ന രീതിയാണ് രണ്ടാമത്തേത്.
600 MHz, 700 MHz, 800 MHz, 900 MHz, 1800 MHz, 2100 MHz എന്നീ ഫ്രീക്വൻസി ബാൻഡുകൾ ഇതിനായി അനുവദിക്കാമെന്നാണ് ട്രായ് നിർദേശിച്ചിരിക്കുന്നത്. എന്നാൽ നിലവിലുള്ള മൊബൈൽ സേവനങ്ങൾക്ക് തടസ്സമുണ്ടാകരുതെന്ന നിബന്ധനയോടെയായിരിക്കും ഇത് നടപ്പാക്കുക.
ടെലികോം കമ്പനികൾക്കും സാറ്റലൈറ്റ് ഓപ്പറേറ്റർമാർക്കും പുതിയ അവസരം
സാറ്റലൈറ്റ് കമ്പനികൾക്കും പരമ്പരാഗത ടെലികോം ഓപ്പറേറ്റർമാർക്കും ഒരുമിച്ച് പ്രവർത്തിക്കാൻ കഴിയുന്ന പുതിയ ബിസിനസ് മാതൃകയും ട്രായ് നിർദേശിച്ചിട്ടുണ്ട്. സാറ്റലൈറ്റ് കമ്മ്യൂണിക്കേഷൻ നെറ്റ്‌വർക്ക് ആസ് എ സർവീസ് (SCNaaS) എന്നാണ് ഈ സംവിധാനത്തിന്റെ പേര്.
ഇതനുസരിച്ച് സ്റ്റാർലിങ്ക് , യൂട്ടൽസാറ് ഒൺ വെബ് , ജിയോ സാറ്റലൈറ്റ് കമ്മ്യൂണിക്കേഷൻസ് തുടങ്ങിയ സാറ്റലൈറ്റ് നെറ്റ്‌വർക്ക് കമ്പനികൾക്ക് തങ്ങളുടെ അടിസ്ഥാന സൗകര്യങ്ങളും നെറ്റ്‌വർക്ക് ശേഷിയും അംഗീകൃത ടെലികോം സേവനദാതാക്കൾക്ക് ലഭ്യമാക്കാം. എന്നാൽ പുതിയ അംഗീകാരത്തിന്റെ അടിസ്ഥാനത്തിൽ സാറ്റലൈറ്റ് നെറ്റ്‌വർക്ക് കമ്പനികൾക്ക് നേരിട്ട് ഉപഭോക്താക്കൾക്ക് ടെലികോം സേവനങ്ങൾ നൽകാൻ കഴിയില്ല. ഉപഭോക്താക്കൾക്കുള്ള സേവനങ്ങൾ നൽകേണ്ടത് അംഗീകൃത ടെലികോം ഓപ്പറേറ്റർമാരായിരിക്കും.
സ്മാർട്ട്‌ഫോൺ നിർമ്മാതാക്കൾക്ക് നിർണായക പങ്ക്
ട്രായിയുടെ ശുപാർശകൾ കേന്ദ്ര സർക്കാർ അംഗീകരിച്ചാൽ ഭാവിയിൽ ഇന്ത്യയിൽ വിൽക്കുന്ന സ്മാർട്ട്‌ഫോണുകളിൽ സാറ്റലൈറ്റ് കണക്റ്റിവിറ്റിക്ക് ആവശ്യമായ ഹാർഡ്‌വെയർ സംവിധാനങ്ങൾ ഉൾപ്പെടുത്തേണ്ടിവരും.
നിലവിലുള്ള എല്ലാ സ്മാർട്ട്‌ഫോണുകളിലും സാറ്റലൈറ്റ് കണക്റ്റിവിറ്റി സ്വമേധയാ ലഭ്യമാകുമെന്ന് ഇതിനർഥമില്ല. എൽ -ബാൻഡ് , എസ് -ബാൻഡ് തുടങ്ങിയ ഫ്രീക്വൻസികൾ പിന്തുണയ്ക്കുന്ന പ്രത്യേക ഹാർഡ്‌വെയർ ഘടകങ്ങൾ ഫോണുകളിൽ ഉണ്ടായിരിക്കണം. അതിനാൽ ഭാവിയിലെ സ്മാർട്ട്‌ഫോൺ രൂപകൽപ്പനയിലും നിർമ്മാണത്തിലും ഈ സാങ്കേതികവിദ്യയ്ക്ക് കൂടുതൽ പ്രാധാന്യം ലഭിക്കുമെന്നാണ് പ്രതീക്ഷ.
ഇനി എന്ത് സംഭവിക്കും?
ട്രായ് പുറത്തിറക്കിയിരിക്കുന്നത് ശുപാർശകളാണ്; ഉടനടി നടപ്പാക്കുന്ന നിയമമല്ല. കേന്ദ്ര ടെലികോം മന്ത്രാലയവും (ഡോട്ട്) സർക്കാരും ഇവ പരിശോധിച്ച് അംഗീകരിക്കുകയും ആവശ്യമായ നിയമപരവും സാങ്കേതികവുമായ മാറ്റങ്ങൾ വരുത്തുകയും വേണം.
ശുപാർശകൾ നടപ്പിലായാൽ ഇന്ത്യയുടെ ടെലികോം മേഖലയ്ക്ക് പുതിയൊരു അധ്യായം തുറക്കാനാകും. മൊബൈൽ ടവറുകളെ മാത്രം ആശ്രയിക്കാതെ ഉപഗ്രഹങ്ങളിലൂടെ ആശയവിനിമയം സാധ്യമാകുന്നതോടെ രാജ്യത്തിന്റെ ഡിജിറ്റൽ കണക്റ്റിവിറ്റി കൂടുതൽ വ്യാപിപ്പിക്കാനും ഡിജിറ്റൽ വിഭജനം കുറയ്ക്കാനും സാധിക്കും.
ഭാവിയിൽ സാറ്റലൈറ്റ് കണക്റ്റിവിറ്റി ഒരു പ്രത്യേക സേവനമെന്നതിൽനിന്ന് സാധാരണ സ്മാർട്ട്‌ഫോണുകളുടെ പ്രധാന സവിശേഷതകളിലൊന്നായി മാറുമോ എന്നതാണ് ഇനി ടെലികോം ലോകം ഉറ്റുനോക്കുന്നത്.
